首先, 我相當鍾意看港產片, 特別好低成本製作, 因為條件所限, 有時會有意想不到的手法和創意, 見到那麼簡陋也能拍出神采, 對有少少電影夢的筆者來說是大大的鼓勵.
但一如藝術系畢業生的陋習, 我也要好扮野地回答 --- 總不能說我同一般人的品味一樣鍾意看港產片... ---所以我說"買兇拍人"這部片在我看來也是相當藝術的, 這是一部有關拍攝電影的電影, 以表面上戲謔的電影語言去探討娛樂商業電影的形成.
(某程度上此論成立, 但我confess我的態度完全是可恨的學混, 如最近Woody Allen 新作"Midnight in Paris" 的Paul; 題外話, 點解套戲竟然無Marcel Duchamp?)
我繼續說, 所以另一部我好鍾意既戲就係"賭俠1999", 佢真係幫巴西嬴返世界杯wor, 想當年我仲係小學生夜晚起身睇世界杯直播, 決賽巴西對法國, 巴西輸三比零, 若說傷心不如說是震撼, 因為我個時先知道原來巴西係會輸波既 (你說童真幾可貴), 在此之前, 以我小朋友的認知, 巴西唔單止嬴, 而且係一種好ideal既勁 (又題外話: 我覺得呢種勁可以話係將一場足球比賽提昇至藝術層次, 足球員成為performer, 詳細可另文再分享).
而"賭俠1999"入面借用這場球賽的直播作場景, 主角劉德華下注巴西隊嬴, 為了瞞過一同收看直播的莊家, 同時補拍由臨記扮演巴西隊的入球片斷插入其中 (張家輝更參與飾演朗拿度), 做成巴西反敗為勝的假象.
賭片的精粹在於騙, 未到最後一刻不知真假, "賭俠1999"以虛假畫面穿插真實, 觀眾樂於被騙, 我說, 這不就是電影的本質.
回到現實世界, 四年後巴西再次打入決賽, 又在家中同一部電視前看直播, 這次朗拿度包辦兩個入球, 巴西二比零勝出, 像極了武俠片中"要返黎攞返晒失去既野", 對我來說, "賭俠1999"比這現實更有救贖意味.
文 : cheng ka wah
逢星期日於Vapin 發表
