我是否需要從新介紹我自己呢？
真
係
好
x
耐
冇
寫
blog～
冇錯，我係vapin 紅極一時（一兩個小時）既文字版廁所位blogger ，區比亞。
突然重遊舊地，略有尷尬，仿如入侵者般不請自來。
係既，份人比較面皮厚，帶三分歉意想再在此分享本人的少少感受。
想同大家分享既係，一次迫巴士的體會。
我係非一般打工仔，我係住係偏遠地區而出到去老遠返工既打工仔。
6點幾就起左身，最遲7點就要仆出去搭巴士既打工仔。
某一天，我預早左出門口。
行到巴士站，等左10分鐘，架巴士黎到站，係一架滿哂人既巴士，巴士列隊中的乘客，有d 急步走上，有d就有所猶疑，而我～～～賴醒咁覺得自己預早左時間，所以等下一班。
再10分鐘～下一班。
okay ～麻煩上天不要賜我一個太富喜劇味的朝早，這次不是冇位坐咁簡單，係搵個位企下都難。但冇法啦，唔等喇，如是者比左十幾蚊去罰企。
在車上，要保持筆直的站姿才得以不與其他人有明確的身體接觸。很好～上天不斷地向我展現佢既幽默感，企在我旁的肥叔叔係有d體臭，最正既地方，e間巴士好似壞冷氣咁，係＿ 焗。
企在我們旁邊的兩位姐姐，都忍不住要拎張紙巾出黎掩住個鼻；而我，好擔心佢地誤以為體臭係我，我亦擰轉面，抬高個頭，裝出一個要吸新鮮空氣的樣子。
就係e個成粒鐘有多既路途上，，我心裡面充滿住多麼的粗口，（仲有d係自創既添），好啦，過左0個幾條漫長既公路，諗住有運行啦，有站喇終於！點知～～～
天呀！你而家係唔係挑梗我機，得喇！你xxx 你好好笑呀！
我已經係個路程上習慣任何異味，0個位肥叔叔係e個時候，同！我！嘔！
那時，在女仕們的尖叫聲下，突然騰出一個空間盛載這壇嘔吐物，這壇嘔吐物帶有幾唔抽象既風格，（陣味仲係相當的具體）大概估到這位叔叔食左個巴士站0個個強記炒麵。
覺得全車人反白眼之制，突然有位企係8達通機旁的阿姐講左一句：等我黎幫你！二話不說，
佢行埋，比支藥油位肥叔叔搽，請有座位的乘客讓座。再拎住份爽報，一頁頁搣出來處理那壇嘔吐物。
當e位英勇阿姐處得7788時，旁人亦紛紛遞她一包紙巾，而巴士亦開始到站，阿姐同叔叔聊起來，我係天下第一既8掛精，聽佢地對話，得知佢地本是相識的，叔叔係稱她為陳姑娘，叔叔是有點輕度弱智，對於自己帶比大家的不便，佢都表現得好唔開心。
當巴士去到一個接一個站，乘客愈來愈少，剩下我們數個，我心裡好想向這位阿姐講聲「唔該哂！」，但總以“會唔會好唐突“ ／“會唔會好作狀“既籍口來制止自己。
頂你！區比亞，本時唔係咁內斂架禾！講句「唔該」姐，駛死咩。
但係每逢想行前開口，都總係似向人示愛咁，非常難於啟齒。
我見我就黎落車，都係借頭借路，拎支消毒洗手液出黎，
同阿姐講：俾你用啦～
阿姐：真係唔該哂禾！
而我：我唔該你就真。
阿姐以一個燦爛既笑容報以回答。
我始終都係呃左人地句「唔該」先。
不過，我總算同阿姐講左句由心而衷既「唔該！」
人生算是少了一個遺憾。
唉～我自己作為一個健全既人，只係識得係度xyz 人；但係，講句「唔該」卻成了無膽匪類。
怨氣謂何總比「唔該」易於出口。
世界從來不完美，但總有漂亮動人的事情閃閃略過。
文: 區比亞
自2010年藝術畢肓生
理論上逢星期五 VAPIN 發佈
