|
劇本：墊杯餅乾
|
角色表：
陳精，一個事業形廣告客戶公關
阿文，阿精男朋友，同一間公司的職員
Salina：阿精的辦公室政治敵人
女同事：陳精和Salina的下屬
胡老闆：廣告公司客戶
待應
場次：
第一幕：辦公室
第二幕：餐廳
第三幕：辦公室
第一幕
(陳精穿著香奈兒套裝，而女同事穿得花俏一點，辦公室內燈光通明，但窗外燈光會漸漸變暗，在這一幕的最後，天色會變成黃昏。地點於辦公室，獨立房，桌子上有一瓶用水養的玫瑰花。阿精坐於椅上，與女同事對話。)
女同事：陳小姐，今次又要麻煩你了！
陳精(揚一揚眉毛)：咩事啊？又喺因為胡老闆？
女同事：就喺囉(嬌聲)，佢又話個MODEL唔夠靚，啲燈唔夠光，仲有啲衫好老土喎。
陳精：(語氣輕鬆)呵，咁佢有冇話想點丫？
女同事：再拍過哂佢喎……
陳精(溫柔地)：唔緊要，今次你幫我接條線打俾佢，我幫你攪店佢，不過你開住條線聽吓我點樣同佢講，下次你要自己做喔。
女同事(鬆口氣)：多謝陳小姐，我馬上出去打電話。
(女同事退場，過了一分鐘左右，陳精案上的公司電話響起)
陳精：胡老闆你好，我喺廣告公司那邊的陳小姐啊。
(四秒後)
陳精：啲花收到喇，昨日收到，好鐘意啊，但係太忙而家先打到電話比你，真係唔好意思。
(陳精玩弄桌上的玫瑰花，四秒後)
陳精：點會呢？我其實一直都想同你傾吓計喇，不過你太忙，都約你唔到。
(三秒後)
陳精：喺喇，頭先聽同事講，胡老闆你對廣告有意見。
(四秒後)
陳精：嗯嗯‥‥‥嗯‥‥‥我當然知道胡老闆你要求高，如果唔喺點會搵我地幫你手呢？
(陳精一面把玩著玫瑰花，三秒後)
陳精：呵呵，胡老闆你的要求我地緊喺做得到，之前的支出都可以完全唔收費，不過你知道喇，我都喺打緊工，公司規矩嘛，之前胡老闆你俾嘅訂金就退唔番囉。(語氣聽似失望，但她把玫瑰花瓣一片片剝下。)
陳精(嬌聲)：喺囉！真喺唔好意思啊！你知道喇，我地間公司話細唔細，其實好多制度，最多今次我私底下打個九折俾你，不過你唔好話俾其他人知啊。
(四秒後)
陳精：啊，禁就太好喇，不如細節我留番同事幫你喇，我都唔敢阻你太多時間。
(三秒後)
陳精：嗯，一定一定，你記得一有時間就同我食餐飯，好喇，我接番條線俾同事先。
(陳精順手將花朵的枝幹丟入垃圾桶，把電話掛上，再低頭處理公事)
(手提電話響起，陳精由手袋拿出手提電話，接聽，同時間取出另一枝玫瑰花把玩。)
陳精：喂？
陳精：嗯，好丫，今晚幾點丫？
陳精：都得！我地直接喺戲院門口等？
陳精：不如睇左戲先食飯喇，唔使咁趕。
陳精：好喇好喇，知道喇！
(突然有一濃妝的女人Salina，衝入陳精辦公室，同時間，Salina注意到陳情案上和垃圾桶皆有玫瑰花的枝幹。)
陳精：做野先，唔同你講住，今晚再見喇！(急急收線，再把玫瑰花放回花瓶。)
Salina(故作溫柔，其實不友善)：陳精，乜你好得閑咩？玩玫瑰花。
陳精(同樣充滿笑容)：唔會用太多時間嘅。
Salina：咁又喺！你時間禁多。
陳精：喺喇，瑪莎出左盒新餅乾，不如你坐低試吓好唔好食？
(陳精伸手取餅乾，salina坐下)
陳精：這隻餅乾應該幾好味，廣告話用香草同牛奶做。
Salina：哈，你自己做廣告，廣告都值得信？
陳精：如果唔信，我地邊會有飯開？
Salina(吃一塊)：幾好味喎，幾錢啊？
陳精：都唔喺好貴，幾十蚊，喺喇，要唔要飲杯茶啊？
Salina(突然變臉)：唔使喇！
陳精(仍然淡定)：嗯？
Salina：乜你禁得閑食餅飲茶嘅？
陳精：點會呢？不過難得同你有機會傾吓計，飲杯茶都唔錯丫。
Salina：如果你自己多野做，又點會得閑理人地啲野啊？
陳精：喔！Salina你喺唔喺有啲咩唔開心啊？
Salina：我講緊你多管閑事丫！乜胡老闆喺你熟客咩？
(陳精笑得更開心，指一指辦公桌上名牌)
陳精：公共關喺主任陳精，全間公司的客戶都喺我熟客。
Salina：個客啲野你熟哂？你明知道個客喺我條Line，你叉隻手入去做乜？
陳精：唔好禁講，份內事姐。
Salina：份內事？
陳精：是丫，我嘅職責喺幫同事手，我知道Saline你平時好忙，我一直都好想幫輕吓你。
Salina(晚娘嘴臉)：你想老闆以為我唔惦就真！
陳精：傻喇，你有通天大能，堂堂業務經理，一睇營業額就知你江湖地位。
Salina：哎？你差在未捧到我上天，我仲以為人人都想我跌入谷底，永不超生。
陳精：點會呢？
Salina：陳精，好多人都覺得我喺八婆……
陳精：唔好咁講。
Salina：你等我講完先。
陳精：喺。
Salina：如果我唔做到咁，你估下啲下屬仲會唔會理我呢？你都話過，全公司營業額最高喺我，如果我舞唔惦班細，我點會有今時今日咁嘅地位？
陳精：喺人都知道Salina你做野認真。
Salina：其實我有利用價值啫，我幫公司搵到錢，公司未仲肯出糧俾我囉，商業社會，點會容得下蛀米大蟲？
陳精：Salina你一定唔喺。
Salina：不過你喺。
陳精：我喺？
Salina：我每日都做到七點八點先收工，你就唔到喇，六點鐘就準時走，次次都話同客食飯，又可以開公數，仲要玩剝花瓣，你份工真喺正。
陳精：我都有我嘅職責。
Salina：飲飲食食？
陳精：喺喇，我仲有野做，不如下次再傾？
Salina：好！既然難得你真喺有野做。。
(Salina退出場外，陳精把案上的一包餅乾快手打成粉碎，再狠狠扔入垃圾箱，順手把垃圾箱踢到房間一角，發出巨響，明顯震怒)
(傳來敲門聲)
陳精：Come in please。
(女同事急急進場)
女同事：對唔住丫陳小姐，今次……
陳精(扮作無知)：什麼事？
女同事：剛剛Salina好似入左你間房。
陳精：喔！同同事傾咗兩句啫。
女同事：喔！你真喺冇野？我頭先聽到好大聲……
陳精：呵，番工又唔係打仗，點會有聲？
女同事：喔！咁可能係樓下裝修太噪。
陳精(笑意更濃)：係喇！我都覺得好噪。
女同事：唔好意思，打擾到你，我番出去做野先。
(臨步出房間，女同事停步回首)
女同事：陳小姐，我想請教一吓，點先可以做得好似你咁百面玲瓏？
陳精：(反射性地)唔好咁講！我都仲學緊。
女同事：陳小姐教人地兩招喇。
(陳精思考了二秒)
陳精：百忍成金。
女同事：(思考了一下)喔！多謝陳小姐！
(女同事退場，陳精站起來，走向房間一角，看著垃圾桶裡面。)
陳精：只怕未成金，我就已經嬲到生癌。
(燈滅)
第二幕
(阿文和陳精手拖手步入餐廳，再坐下，餐廳播出尋常不過的背景音樂)
阿文：哎，你唔好坐出面，坐入面喇。
陳精：好丫。
阿文：冷氣凍喎，你唔著番件衫？
陳精：好丫。
(陳精取出外套穿上)
阿文：你睇吓我隻手有啲乜？
(陳精看一看阿文的手掌)
陳精：丫！這隻朱古力我好鍾意食！
(陳精伸手取朱古力，原來該朱古連著有一串，足足一尺長，阿文只把其中一夥表露在手掌上，其他收於手袖之內，當陳精取朱古力時，同時把全串朱古力拉出，陳精表現驚喜。)
陳精：吓！咁多嘅！？
阿文：知道你鐘意食嘛！
(陳精把其中一夥朱古力取出，阿文接過，幫陳精打開包裝，再餵陳精吃下。)
阿文：咩味尼嫁？
陳精：原來入面有脆米。
阿文：每一粒都唔同味嫁。
陳精：哈，好好味啊，你食唔食？
阿文：你食喇。
(阿文伸手向陳精臉上一摸)
(在陳精吃糖的時間)
阿文：係喎，今日喺公司，好多人講起你。
陳精：乜喺咩？佢地講咩丫？(陳精把朱古力吞下，飲一口水。)
阿文：話你喺一個出色的公關主任。
陳精：喔！(語氣開心)不過我個位永遠都冇得再升職(扮作失望)。
阿文：哈，咁又喺，一間公司唔需要太多公關。(語氣嬉皮)
(陳精微笑沉默，氣氛變得怪異)
陳精：哈，乜係咩？(語言低沉)
阿文：不過做公關幾好丫，同啲客傾吓計，寫吓新聞稿就得。
(陳精再次沉默)
(待應來到陳精和阿文面前，為他們落單)
阿文：想食咩丫？
(陳精看餐牌)
陳精：T骨牛扒。
阿文：食牛對皮膚唔好。
陳精：焗海鮮意粉。
阿文：海鮮咪仲衰！
陳精：喔……
阿文：食雞扒沙律喇。
陳精：喔，是旦喇。
(阿文向侍者招手，侍者走近。)
阿文：(對待者)唔該，一個雞扒沙律，一個牛扒薯菜，半生熟。
(陳精看一下阿文，再度沉默)
阿文：頭先套戲好唔好睇啊？
陳精：ok喇，第一次睇3D電影，原來喺咁。
阿文：點丫？
陳精：唔喺好3D。
阿文：又喺你話要睇這套。
陳精：我冇話唔好睇丫。
阿文：喺喇，頭先個套地心探險記呢……
陳精：嗯嗯
阿文：佢話地底有食肉植物，這個諗法真喺幾得意。
陳精：好細個時已經聽人講過有食人花，唔新奇丫！
阿文：不過你諗吓，其實都有可能喎！喺地底冇陽光，不過食肉植物唔需要陽光，佢食其他動物都生存得到。
陳精：喺咩？(不感興趣)
阿文：喺丫，食肉植物只須要食其他動物，都吸收到足夠營養。
陳精：其實沒可能(沒好氣)
阿文：噢？點解呢？
陳精：唔講喇。
阿文：講喇，講啲又唔講啲。
陳精：如果食肉植物食動物，咁動物食乜野？
阿文：食番啲植物囉。
陳精：喺自然界入面，假設一千棵草先可以養一百隻兔仔，一百隻兔仔養一隻老虎，先維持到生態平衡。如果有食肉植物可以食老虎，咁用乜野去養老虎？更何況你講過地底冇陽光，冇光合作用，連草都養唔到，點養得到動物？又點會有食肉植物？
阿文：你唔喺做公關咩？幾時做咗科學家？
陳精：中三科學，必修課程入面嘅「食性層次」同「熱力學」理論，但我中學讀商科。
阿文：最叻喺你！
陳精：我一早話過唔講。
阿文：野食到喇，食野喇！
陳精：喔！
(待應把食物放下)
陳精：你個餐好似幾香喎。(伸出餐具去取阿文的食物)
阿文：我覺得咁樣唔喺咁好。
陳精：乜野唔喺咁好？(一臉茫然)
阿文：我覺得你唔喺好尊重我？
陳精：我點唔尊重你？
阿文：你冇問過我就拎我啲野食。
陳精：我地一向都喺禁，你之前都冇話過唔鍾意。
阿文：即喺你一向都唔尊重我囉。
陳精：咁你之前唔講我而家點知啊？
阿文：你詭辯。
陳精：好喇，我唔想講喇。
阿文：成日都唔講，講唔夠兩句就唔講。
陳精：我放左工唔想再受氣。
阿文：我唔使番工咩？
陳精：我話唔想再講。
阿文：都話你唔尊重我，你話唔講就唔講。
(陳精不作聲)
阿文：我同緊你講野啊！
陳精：喺喇，我話唔想講就唔講，得唔得？
阿文：點解次次都要我就你？
陳精：幾時次次都喺你就我？我就緊你時你唔知啫。
阿文：喺喺喺，最叻喺你。
陳精：你又想講乜？
阿文：喺老闆面前你成隻死狗咁，老闆前老闆後，上司前上司後，喺我面前又唔見你咁溫柔？
陳精：我應該溫柔？
阿文：你喺我女朋友，應該溫柔。
陳精：做你女朋友就應該溫柔？
阿文：所有女朋友都應該溫柔啊！
陳精：如果我唔溫柔呢？
阿文：你番工時對老闆明明好溫柔。
陳精：但喺你冇出糧俾我。
阿文：即喺出糧俾你就乜都得喇？
陳精：你講野小心啲。
(阿文沉默)
阿文：成間公司都讚你忍耐用高，八面玲瓏。
陳精：我唔覺得係成間公司，最少我唔覺得你會讚我。
阿文：只不過我唔覺得你對住我有忍耐過。
陳精：算喇，不如我地唔好再講野。
阿文：吓？
陳精：唔好講野住，你聽吓？
阿文：吓？
陳精：你聽！你聽唔聽到啲音樂？首歌幾好聽。
(餐廳仍然播放尋常不過的音樂)
阿文：喂，我同緊你講野。
陳精：喔！
阿文：喔？你咁算喺乜野意思？
陳精：丫！你碟野又幾好食喎！我可唔可以食多件？
(燈滅)
第三幕
(辦公室)
(陳精步入辦公室後，深呼吸，再坐到位置上，女同事手上拿著一盒瑪莎餅乾，步入陳精的辦公室)
女同事：陳小姐早晨。
陳精：早晨。
女同事：陳小姐，我知道你鍾意食這隻餅乾，昨日行街經過見到，送俾你。
(女同事雙手把餅乾放在陳精桌上。)
陳精：多謝。
女同事：陳小姐今日精神好似唔喺太好。
陳精：(微笑)，哈，昨晚訓得唔好，我化番個妝就冇事。
(陳精從手袋拿出化妝品整理儀容，把粉底往臉上塗。)
女同事：最近好多人感冒，小心身體。
陳精：(看一看女同事)嗯，我知道喇。
(Salina入內)
女同事：(聲音害怕)Salina早晨，你有事搵陳小姐？咁我番出去做野先。
Salina：等陣！
(女同事站在門邊)
女同事：喺！
Salina：你一陣入我房搵我！
女同事：知道。
Salina：記得你份Proposal！
女同事：喺！知道。
Salina：嗯
(女同事離開)
Salina：(對陳精)陳精，你今朝好忙？乜番到公司先化妝丫？
(陳精仍然在化妝)
陳精：哎呀！我一定喺太專心，你敲門我都聽唔到。
Salina：我冇敲門丫。
陳精：喔！原來你冇敲門。
Salina：有咩問題？我頭先講緊野，你都知道我入咗尼喇！
陳精：喔！係！冇問題。
Salina：喺喇，我有野問你。
陳精：請問。
Salina：吓？
陳精：我話請問。
Salina：你都有野想問？
陳精：喔！唔喺，你有野問我啊？你問喇。
Salina：古古怪怪，喺喇，我想知道上次你包餅喺邊買。
陳精：瑪莎。(沒好氣)
Salina：你仲有冇丫？我而家想食。
陳精：冇。
Salina：(指一指陳精案上的餅乾)這一包喺乜？
陳精：這一包我唔方便俾你。
Salina：喔！禁又喺！你禁多熟客，俾熟客食呢？
陳精：我同客人關係好，喺我職責。
Salina：包括同胡老闆食飯？
陳精：你想講咩丫Salina？(柔聲)
Salina：胡老闆叫我幫佢約你今日食lunch喎。
陳精：喔，唔該哂，我自己覆佢得喇！
Salina：我唔知道你仲跟緊佢個case。
陳精：冇啊，我上次幫同事打左一次電話咁多。
Salina：但喺我剛剛收到胡老闆祕書電話，佢話要取消個廣告！(大聲)
陳精：吓？點解啊？
Salina：如果你都唔知，我又點會知丫？你同佢咁熟！
陳精：Salina你今日真係有趣，講啲野咁難明嘅。
Salina：咁我講白啲喇！明明尋日都仲好地地，點解今日又會取消丫？
陳精：我唔係好明。
Salina：我講得仲唔夠白？你一句就拉得住個客，講多句又有幾難丫？你知唔知個廣告值幾多錢呀？幾百萬嫁！你幫唔幫到公司搵幾百萬丫？
陳精：講多句？講多句乜嘢啊？哈！(冷笑)
Salina：咁我再講白啲，我話你倒緊公司米！
陳精：你懷疑我做小動作？我嘅職責好簡單，就係幫公司賺取最大利益，不如你解釋下，點解我要咁做？
Salina：頭先聽到清潔啊姐同人地傾計，話你將包好地地嘅餅乾掉入垃圾桶，原來你EQ咁低，昨日同我傾兩句，唔高興就掉野，浪費食物。
陳精：包餅我跌咗落地下，碎咗我唔想食，關你咩事？
Salina：得喇！(大聲)我唔想知道你包餅點樣，總之你最好幫我搞番店胡老闆個case喇。(表現厭惡)
陳精：個客唔喺我跟開，我上次只喺幫同事打電話，我點知道你啲下屬辦事能力喺點？有冇得罪啲客？你唔問下自己啲人先尼搵我誨氣？。
Salina：我聽人講你同佢好熟喎，你而家打個電話去搞掂佢都好易啫。
陳精：我講多次，我上次只喺幫人。(仍然盡力溫和)
Salina：咁你而家跟埋個客都唔係好難啫！
陳精：唔難，不過唔知點解，這個要求由你把口講出嚟，真係有啲難聽。
Salina：咁你即係唔肯幫我喇？
陳精：考慮吓囉。
Salina：公關小姐，我覺得你態度好有問題。(一個一個字吐出)
陳精：同你比，唔算。
Salina：原來公關喺咁講野。
陳精：對住你，如果唔咁講野，應該點講？
Salina：你而家係唔係決定同我搞對抗？
陳精：唔敢！不過有兩點我想你搞清楚，第一，出糧俾我個個唔喺你，第二，你唔喺我個客，我無必要吓吓受你氣。
Salina：我諗我要同老闆傾吓你仲適唔適合這份工。
陳精：如果我吓吓俾人踏上心口，我真喺唔太適合這份工。
Salina：非常好！(大聲)，你搵定工喇！
(Salina回到後台，陳精走到門邊，一邊微笑一邊關門。關門後伸個懶腰，再坐在辦公室的書桌上，一面把高跟鞋脫掉一半，一面吃餅乾。但突然間有人敲門，陳精連忙把鞋子穿好，並站在地上，走去開門。)
女同事：你OK嗎？我見到Salina好嬲噤番左房，之後仲要掉野。
陳精：掉你份Proposal？
女同事：丫……
陳精：胡老闆份Proposal？
女同精：我唔方便講太多。
陳精：呵！佢EQ低，冇人幫到佢。
(陳精把餅乾伸給女同事)
女同事：陳小姐我唔食喇， 你唔好咁講佢喇。
陳精：我原本都覺得，上天總有一日自然會派件辣貨收拾佢，洗乜我親自出手？但喺我諗諗吓，覺得等到得有人肯出手時就已經太遲。
女同事：陳小姐，你今日同平時好唔同。
陳精：可能咁先喺我真本性。
女同事：為左包餅展露真本性？
(陳精思考了一會)
陳精：所有人都認為，作為一個公關，就應該溫柔體貼。
女同事：唔通唔應該？
陳精：當然應該，就好似我手上面塊餅乾一樣(陳精把餅乾舉到眼前)，你睇吓，所有人都覺得餅乾喺應該拎尼食，而除左拎尼食之外，佢冇其他功能。
女同事：我唔喺好明。
陳精：如果，我將一塊好地地嘅餅乾放喺桌面，拎尼墊杯，你一定會覺得我痴咗線。
女同事：如果要墊杯，應該用杯墊丫。
陳精：咁杯墊除左墊杯之外，仲有冇其他用途？
女同事：我諗唔到有。
陳精：的確喺咁，餅乾喺拎尼食，杯墊喺拎尼墊杯。喺所有人眼中，餅乾永遠都唔可以做杯墊。
女同事：點解餅乾要做杯墊？
陳精：你應該問，點解唔可以？做公關，就一定要八面玲瓏，做女朋友就一定要溫柔體貼。又好似一個觀眾去睇戲咁，如果有周星馳，就一定喺笑片，睇韓劇，就應該喊到收唔到聲，條路軌喺點，就要跟住行，如果行出左條路軌，就等同離經叛道，欺師滅祖。
女同事：我覺得有身份就應該有責任，好似警察應該維持治安一樣。
(陳精思考一會)
陳精：但喺完成職責之外，可唔可以保留個人喜好同性格呢？
女同事：我唔知道，我只喺覺得我地應該做好本份。
陳精：如果個人意向同職責有抵觸呢？
女同事：咁即喺唔適合份工囉？
(停頓)
陳精：呵，你喺聰明女，我都諗唔到。
女同事：點會呢？
陳精：我記得有人講過，我地喺社會入面，就好似其中一塊齒輪，只要每個人做好自己本份，完成自己職責，個社會就會運作如常，只要個社會唔倒塌，我地就仍然會安好無事。
女同事：陳小姐想轉工？
陳精：緊喺唔喺，我好鍾意同你地一齊做野，我仍然會做好自己職責。
女同事：陳小姐你今日好古怪。
陳精：因為我今日諗起好多問題。
女同事：陳小姐，你有冇事啊？
陳精：冇事。
女同事：今日Salina咁嬲，我怕佢會同老闆講……
陳精：我哋老闆只會相信一個幫佢搵到錢嘅下屬，邊個做到野，邊個就有地位。
女同事：雖然我喺下屬，不過陳小姐平時成日幫我地啲同事，如果你有乜野事，我地一定會幫你手。
陳精：我知道喇，多謝你哋。
女同事：喺喇！頭先你男朋友阿文打過尼，話你手提唔通，佢想約你食飯。
(陳精打開手袋，檢查手提電話)
陳精：喺喎，一定喺頭先聽唔到電話響。
女同事：如果你冇野，咁我番出去做野先喇。
陳精：等等！係喇，唔知道你可唔可以幫我一個忙……？
女同事：當然可以喇。
陳精：清潔姐姐好似係外判公司請番尼丫可？
女同事：係啊。
陳精：幫我打俾清潔公司，換一個新人番工。
女同事：啊……(停頓)如果清潔公司問起原因呢？
陳精：(明顯是裝出來的輕鬆)公司地板成日都好多塵。
女同事：(停頓)，知道，我馬上去做。
陳精：唔該哂你！(微笑)
(女同事離開之後，陳精把餅乾放入櫃子，陳精深深地呼吸一下，放下手上的手提電話，拿起公司電話，按下號碼，停頓。)
(陳精拍一拍面頰，再打通電話)
陳精：(語氣快樂)喂？胡老闆啊？我喺廣告公司陳精，我想問你今日中午得唔得閑丫？
(停頓)
(燈滅)
(黑暗中，舞台傳出聲音)
陳精：(語氣輕鬆)冇咩丫，我想同你食餐飯。
(全劇完)
(版權所有，不得轉載和下載)
我是江凱勤
我沒打算過從事戲劇工作，
不過，戲場是一件有趣的事。
FB: Thomascheery@hotmail.com
