正所謂有咁耐lunch time 就有耐折墮，
d 野堆堆埋埋，就連廁所位都冇時間去理。
大家就當屯門有時差，所以攪到今日星期六先upload 到。
好講返正題。
我估好多va 既朋友仔都會教過畫，好想知大家會點教畫？
我現在份教畫祕撈都教到第五個年頭，已經好麻木，最深刻都係出糧既時候。
近排，開始反思梗「教畫」既意義。
個意義就係無意義。
以下係我這數年裡少少的教畫心聲。
如果d學生年紀細，你去教畫，你主要做既野係討好d家長。
點討好法？
就係一個hrs 之內協助個小朋友完成作品。
一份稱得上已完成既作品既元素要有： 1）主角要清晰 2）有背景 3）有底色
而係一對n個小朋友既情況下，點樣先可以令到d小朋友每堂出到一幅已完成好的作品？
首先要達成 1） 主角要清晰，個祕訣咪就係教畫一個簡單d既事物，千祈唔好教小朋友一d 複雜既野，就算幾有意義都好，個主角畫得再好都冇用，用哂d時間黎畫個主角，個背景空哂，你就會比人投訴。
要達成2）有背景，其實次次既背景不外乎係花花草草，唔駛有咩偉大既創意，旦求個背景夠多野，有哂彩虹呀，有屋呀，有蝴蝶呀，又五顏六色咁，咁就最好。
3）底色方面其實係上述3個元素中，最重要既一環，幅畫幾唔靚都好，都可以靠個水彩底色搞到好似好豐富咁。
教畫個世界係容納唔到minimalism，小朋友幅畫個主角要具象，主次分明，顏色要多，畫紙每個地方都要畫舊野。
咁d 小朋友咁細，點樣可以令個小朋友有耐性地畫好一張畫？
個答案係：冇野可以令到一班小朋友有耐性。所以上完堂前既10分鐘，教畫0個個會做埋畫0個個，打仗咁ko 哂d畫。
就係咁開左頭，到d小朋友大d，高小，初中，高中。
對於畫畫，好自然要求自己畫到d野更具象、更寫實；主次背景講透視；仲要打埋個底色，你幅畫先叫完。
各位如果有考公開視藝試，老師都應該有再三叮囑你份painting 唔可以留白，有白色位就叫unfinished～咁你就會唔合格。
跟據e個理論，張大千去考，都應該會唔合格。
因為仲有好多野想講，我留返下星期五再講。
文: 區比亞
自2010年藝術畢肓生
逢星期五 VAPIN 發佈
